Яшнобод темирйўл касб-ҳунар коллежида ана шу мавзуда адабий-маърифий тадбир бўлиб ўтди. Туман Хотин-қизлар қўмитаси ва Мудофаа бўлими ҳамкорлигида уюштирилган тантанада маҳаллалар фаоллари, ҳозирда ўз йигитлик бурчини ўтаётган аскарлар оналари, ҳарбий фахрийлар ва ёшлар иштирок этди.
Унда Яшнобод туман ҳокими ўринбосари, туман хотин-қизлар қўмитаси раиси Феруза Раҳматуллаева, туман Мудофаа бўлими бошлиғи, подполковник Фаррух Маннонов, фахрий Вадим Пархоменко ва бошқалар сўзга чиқди.
Давлатимиз раҳбари таъкидлаганидек, «Барчамиз бир фикрни яхши англаб олишимиз керак: эл-юртимизнинг тинчлигини таъминлаш мақсадида бугун мудофаа соҳасида амалга оширилаётган ислоҳотларнинг қанчалик самара бериши армия ва халқнинг бирдамлигига боғлиқ».
– Ўғлим Фарғона гарнизони ҳарбий қисмларидан бирида хизмат қилмоқда, — дейди яшнободлик Сарвигул Абдураҳмонова. — Муҳаммадали уч ўғилнинг тўнғичи бўлгани боис ундан кўпроқ хавотирланаётган эдик. Ҳарбий қасамёд муносабати билан ташкил этилган тантанали тадбирга борганимизда ҳарбий қисмда яратилган шароитларни кўриб ҳайратландик. Ўғлимни тетик ва хуш кайфиятда кўриб, қўмондон ва хизматдошларининг у ҳақда билдирган илиқ фикрларини эшитиб, жуда хурсанд бўлдим.
Бошқа аскарларимизнинг онаси сингари мен ҳам ўғлимнинг тинч даврда хизмат қилиши, мамлакатимизда осойишталик ва ҳамжиҳатлик ҳукм суришини тилайман.
Ўзбекистон Қуролли кучларининг 26 йиллиги ва 14 январь — Ватан ҳимоячилари кунига бағишланган байрам тантанасида Ички ишлар вазирлиги қошидаги Қоровул қўшинлари оркестри, ашула ва рақс ансамбли, туман маданият бўлими хонандаларининг чиқишлари йиғилганларда илиқ таассурот қолдирди.
Манба: www.yashnobodnews.uz