22 декабрь — Ўзбекистон Олий Мажлиси Қонунчилик палатаси ва маҳаллий кенгашлар депутатлари сайлови куни.
Ўтаётган ҳар бир кунимиз халқимизни юртимизнинг энг йирик сиёсий тадбири бўладиган санага яқинлаштирмоқда. Унда эса сайловчилар билан кўпроқ учрашувлар уюштирган, мулоқотлар қилган, уларнинг дарди ва муаммоларини тинглаган номзодлар энг кўп овоз олиши шубҳасиз.
Бугун қай бир сайлов участкасига борманг қизғин иш устидан чиқасиз. Мамлакатимиздаги сайлов округлари ва участкалари сўнгги ҳозирлик юмушлари авжида.
Жумладан, пойтахтимизнинг Яшнобод туманидаги 143-Саноат сайлов округидан Олий Мажлис Қонунчилик палатаси депутатлигига Ўзбекистон “Адолат” социал-демократик партиясидан кўрсатилган номзод Муаттархон Абдуллаева имкониятдан унумли фойдаланиб, сайлов участкаларида сайловчилар билан кўпроқ учрашувлар уюштиришга интилмоқда.
Куни кеча Муаттархон Илёсовна туман кўптармоқли марказий поликлиникаси, 28-оилавий поликлиника ҳамда туман мактабгача таълим бўлими тасарруфидаги мактабгача таълим ташкилотларида фаолият олиб бораётган ўз сайловчилари билан учрашувлар ташкил этди.
Очиқ ва ошкоралик руҳида кечган мулоқотларда номзоднинг ишончли вакиллари Боқи Алихонов, Вилоят Акрамова ҳамда Қундуз Сайдалиева йиғилганларни Муаттархон Абдуллаеванинг таржимаи ҳоли, меҳнат фаолияти билан таништирди.
Шундан сўнг, номзод йиғилганларни ўзининг Сайловолди дастури билан таништириб, Ўзбекистон “Адолат” социал-демократик партиясининг беш йилга мўлжалланган энг муҳим мақсад ва вазифалари ҳақида гапириб берди.
Манба: www.yashnobodnews.uz