Пойтахтимизнинг Яшнобод туман ҳокимлигида туманда фаолият олиб бораётган экспортёр корхоналар вакиллари билан учрашув бўлиб ўтди.
Тадбир ҳудудий экспорт прогноз кўрсаткичларини бажариш мақсадида ҳудудларда фаолият кўрсатаётган экспортёр корхоналар фаолиятини ўрганиш, мавжуд муаммоларни бартараф этиш ҳамда уларга амалий ёрдам кўрсатишга бағишланди.
Очиқ ва самимий мулоқот руҳида кечган учрашувда Тошкент шаҳар ҳокимининг инвестициялар, инновация, саноатни, туризмни ривожлантириш ва хусусийлаштирилган корхоналарга кўмаклашиш масалалари бўйича ўринбосари Шароф Рахманов иштирок этди. Шунингдек, тадбирга туман ҳокими ўринбосарлари, Тошкент шаҳар прокуратураси масъул ходимлари, солиқ, банк тизими вакиллари, тадбиркорлар ва бошқа мутасаддилар таклиф қилинди.
— Мамлакатимиз иқтисодиётининг барқарорлигини таъминлашда барча соҳалар қаторида экспорт салоҳиятини ошириш ва экспортёрларга қулай имкониятлар яратиш бугунги замоннинг асосий талабига айланмоқда, — деди Шароф Рахманов. — Мақсадимиз эса юртимизнинг экспорт имкониятларини янада кенгайтириш ва бунинг учун барча зарур чораларни кўришдир. Соҳада эришилаётган ютуқлар билан биргаликда ечимини кутаётган айрим муаммоларнинг мавжудлиги ҳам кўпчиликка сир эмас. Бугунги учрашувдан кўзланган бош мақсад ана шу камчилик ва муаммоларга биргаликда ечим топиш, ишларимиз самарадорлигини оширишдан иборат.
Тадбирда туманда фаолият кўрсатаётган ўнга яқин экспортёр корхоналар раҳбарлари қатнашиб, ўзларини қийнаётган муаммолар ҳамда таклифлари билан ўртоқлашдилар. Унда маҳаллий маҳсулотларни экспорт қилиш борасида мавжуд муаммолари муокама этилди. Тадбиркорларни қийнаб келаётган саволларга батафсил жавоб қайтарилди.
Манба: www.yashnobodnews.uz