Пойтахтимизнинг Яшнобод туманидаги 231-сонли умумий ўрта таълим мактабида «Китобхон оила» кўрик-танлови бўлиб ўтди.
Унда иккинчи синфда таҳсил олаётган олти нафар ўқувчи ўз оиласи жамоаси билан иштирок этишди. Танловда қатнашчилар бешта шарт бўйича ўзаро баҳслашдилар. Таништирув, баҳру байт, саҳна кўринишлар, халқ мақоллари айтиш ҳамда эркин мавзу каби шартларда ўз билим ва маҳоратларини намойиш этишди. Эътиборлиси, унда фарзандлари қаторида оналар ҳам фаолликлари билан ажралиб турдилар.
Танлов якунида Равшанбековлар оиласи биринчи ўринни эгаллаб, «Энг ибратли китобхон оила» номинациясида ғолибликни қўлга киритишди.
Шунингдек, тадбирда иштирок этган барча иштирокчилар турли номинациялар бўйича совриндорлар қаторидан жой олдилар.
Танлов ниҳоясида барча ғолиб ва совриндорларга мактаб раҳбари Нилуфар Инамова диплом ҳамда эсдалик совғаларини топширди.
Ўзига хос китобхонлик байрамини ташкил этишда кутубхоначи Фарида Бегаева ҳамда жонкуяр синф раҳбари Ирода Ҳайитоваларнинг хизматлари катта бўлди.
Тадбир доирасида яқинда ушбу таълим масканида бошланғич синфлар ўқувчилар ўртасида ўтказилган “Энг чиройли ҳуснихат” танловининг ғолиб ва совриндорлари ҳам мактаб маъмурияти томонидан тақдирланишди.
Манба: www.yashnobodnews.uz