Энг улуғ ва энг азиз байрам мамлакатимиз мустақиллигининг йигирма етти йиллик шодиёналари юртимизнинг барча гўшалари каби Яшнобод туманида ҳам зўр тантана қилинмоқда.
Туман ҳокимлиги ташаббуси ва саъй-ҳаракатлари билан 31 август оқшомида “Янгиобод” тўйхонаси ўзгача чирой очди. Яшнободлик фаоллар, тадбиркорлар, зиёлилар ҳамда ижтимоий ёрдамга муҳтож кам таъминланган оилалар вакиллари учун тўкин дастурхон ёзилиб, истиқлолимиз шарафига базму жамшид уюштирилди.
Тантанани Яшнобод туман ҳокими вазифасини бажарувчи Ҳожиакбар Тиллашайхов очди ва барчани энг улуғ, энг азиз айём — Ўзбекистон Республикаси мустақиллигининг йигирма етти йиллиги билан табриклади.
Шундан сўнг, тўйхона тўрига ўрнатилган улкан монитор орқали мамлакатимиз Президентининг байрам муносабати билан йўллаган табриги тантана иштирокчиларига намойиш этилди.
Дилларга ўзгача шукуҳ, қалбларга шукроналик солган байрам оқшоми юртимизнинг таниқли санъат усталари ижросидаги куй-қўшиқлар билан янада юракларни тўлқинлантирди, даврага файз киритди.
Манба: www.yashnobodnews.uz